~كرسى الاعتراف~

تذكير بمساهمة فاتح الموضوع :

لالالالالالالالالالالا
حرام والله
قرعة اية
انت كنت عايز كدة من الاول
طيب والنبى الرحمة عشان عندى امتحانات
وشكرا على الاختيار الفظيع دة

فاطمه
lovely smile
الابتسامة الجميلة
يعني الابتسامة اللي بتديك امل في الحياة
الابتسامة اللي بتقولك ان بكرة احلي
ابتسامة كلها تفاؤل و مرح
متفائلة مرحة
مثال للرقة و الاحترام و الطيبة
مع اني كنت واخد انطباع عن فاطمة انها جد زيادة عن اللزوم في اول السنة
الا ان هذا الانطباع سرعان ما تلاشي لما اتعرفت عليها اكتر
من الشخصيات اللي علي الاقل بالنسبة ليا
عمري ما شفتها مضايقة او زعلانة
الا لظروف قهرية
من الناس اللي تحب تعرفهم في حياتك
شخصية قيادية اجتماعية متفوقة
من افضل الاشخاص اللي اتعرفت عليهم في الكلية
و اللي زعلان جدا انها كانت اخر سنة ليها في الكلية
بجد كلنا حنفتقدها السنة الجاية
لما تضرب مثل بالصداقة القوية
يبقي علي طول تفتكر فاطمة و ضحي
ما دام شفت فاطمة
يبقي لازم تشوف ضحي
صديقتان لا تنفصلان عن بعضهما البعض
و دا بيدل علي مدي الترابط و الحب اللي بينهم
ربنا يوفقك يا فطومة

بجد ميرسى جدااا يا ايهاب
على الكلام الجميل ده
انا بجد اللى مبسوطة انى
اتعرفت على انسان كويس
واخلاق زيك
ربنا يفوقك دايما يارب
وتكون فى احسن حال دايما

اماانا وضحى فيارب دايما
نفضل على طول مع بعض
يجمعنا الحب والصداقة
والاخلاص

_ غرق المنتدى ومعك قارب مايشيل الا ثلاثه من تاخذ معك ؟

و لو تلاتة من غيري
يبقي انا و بيكهام و صبري و عبد القوي

كده برضو يا ايهاب
ولا بنت تنقذها
نهون عليك للدرجة دى
وفين الصداقة بقى
ههههههههههههه

بجد اجاباتك جميلة يا ايهاب
الله ينور
وفى انتظار باقى الاجابات
ربنا معاك

حبيبي يا هوبا عاوز تدخل معايا سينما يله بينا قول انت بس
وكمان عاوز تستلف مني فلوس من غير ما تقول يا هوبا انت عارف
يا عم ولا يهمك انت عارف اللي في جيبي في جيبك يا هوبا
أنت بس اطلب ومالكش دعوة من عنيا الجوز ومنخيري اللوز

روشا
different style
شخصية مختلفة عن الشخصية التقليدية للبنت
علي سجيتها و طبيعتها دايما
بتحب الهزار و الضحك
اصل لو مش هنههزر ونضحك هنعمل اية فى حياتنا ولازم ابقا على طبعتى اى نعم انا مش فهمه يعنى اية سجيتها دى بس تقريبا حاجة حلوة هههه اصلى مش بحب التقيد فى التعامل ولو حسيت انى متقيدة ومش على طبيعتى بمشى

تحس انها شخصية ولد جدع جدا
فعلا ينطبق عليها اسم روشا
او الاحسن نخلية روشة
من الروشنة يعني
شخصية اجتماعية
دمها خفيف
و اعتقد انها بتحب الاغاني و المسلسلات الاجنبي
صح؟
ربنا يخليك والله على الكلام دا هو صح 100 فى ال100
اما بخصوص الاغانى فانا بحب كل الاغانى الحلوة اللى تعجبنى مش مهم الجنسية
اما فى المسلسلات فانا بكره المسلسلات المصرية والخليجية غير كدا كله حلو وخصوصا السورى وبريزون بريك

بس مش عارف ليه حاسس ان روشا مبتاخدش علي الناس بسرعة
و انا اقصد هنا الولاد يعني
و اعتقد انهم قليلون جدا من يعرفون روشة حق المعرفة
يعني من الاخر مش اي حد ينفع يكون صديق وفي ليها

الله اعلم كلامي دا صح و لا غلط

هو انا فعلا مبخدش على الولاد بسرعة يمكن دا من انى معنديش اخ ولد ومش بعرف اتعامل معاهم كويس ومبثقش فيهم بسرعة فلازم اتعامل معاهم كذا مرة عشان اخد عليه واعتبره اخويا واتكلم معه عنى بس مش بتعامل معاهم وحش يعنى
والولاد اللى تعرف عنى حاجة او عن حياتى الشخصية فى الكلية 2 بس
بس دى مش حاجة تزعل اعتقد
وميرسى على تحليلك ليا وتحليلك صح جدااااااااا
واجاباتك تحفة بجد كلها
وبخصوص سؤال الغرق دا فاحنا مش مستنين ولاد اللى ينقذنا معانا ربنا وصحتنا هههههه نعوم فيها اية يعنى هى صعبة دى
واجابة سؤال من سيربح المليون جامدة جدا

شكرا ليكم كلكم يا جماعة علي ردودكم الرائعة دي

و سلام مخصوص اوي يا بيكهام علي الهيبرة العالية دي

انت كنت ضارب ايه ياض و انت بتكتب الردود دي؟

لما اشوفك بس

انا غلطان اني انقذتك معايا في القارب اساسا

فعلا...خيرا تعمل ...شرا تلقي

المفروض فعلا..كنت انقذت 3 بنات احسن

برقبتك ياض

لانك خليتهم عملوا انقلاب عليا

بس و الله حتي هيبرتك دمها خفيف

شكرا لكل الناس اللي ردت

أدهم
بيكهام
اودي
اية
لمياء
مادو
احمد حسن
فطومة
دولة
روشا

شكرا جميعا علي ردودكم الحلوة
و اسف علي التاخير في الاجابات

انا حنزل جزء صغير دلوقتي ان شاء الله

حمد لله علي السلامه يا هوبه
وبانتظار باقي الاجابات باذن الله

ايمي
forum,s child
طفلة المنتدي

و انا هنا مش قصدي طفلة بالمعني العقلي
انما ببراءة الاطفال
دلوعة جدا
حبوبة جدا
رقيقة جدااااااااااااااااااااااااااااااااااااااااااااااااااااااااااااااااااااااااااااااااااااااااااااا
اي حاجة ممكن تزعلها
و اكيد انتي فاهماني يا ايمي

و دا يمكن احد عيوبها القليلة
انها.....حساسة جدا و بتتأثر بسرعة
و موضوعاتها في المنتدي اكثر من رائعة
و طريقة ردودها جميلة جدا و سلسة و منمقة

أخبار النصيحة بتاعتي ايه يا ايمي؟
عملتي بيها و لا لسة
يا رب تكوني عملتي بيها

اولا : حمد الله على السلامه يا قمر
ثانيا:ربنا يخليك على الكلام اللى قلته فى حقى وعلى تحليلك لشخصيتى
ثالثا: والله انا بحييك جداااااااااااااااااااااااااااااااااا على ردودك المتناهيه فى لصراحه
رابعا: طبعا يا قمر انا فهمه انك تقصد ايه وبجد انا بحاول اخد بنصيحتك وبجد انت مش تتخيل كلامك اثر فيه ازاى بجد مرسى على نصيحتك وادعيلى انى انفذها كلها
خامسا: طبعاااااا شرف ليه انى موضوعاتى بتعجبك بس ده من بعض ما عندكم دا انا بتعلم منك يا هوبه

وبجد انا مش لاقيه كلام يوصف قد ايه انا فرحانه وفخوره انى اتعرفت على شخصيه صريحه كده ومش بتجامل حد وبتقول كل اللى هى حساه من غير ما تزينه بجد انت ادتنى امل كبيييييييييير ان الدنيا لسه بخير وان الصق والصراحه مش عمله نادره اوى فى وقتنا ده

يا ايها ب يا فقر
خلص بسرعه عشانن لما بتسيب الاعضاء يردوا

بيردوا باسهاب شديد

وبكتروا اوى والعغمليه مش ناقصه ف الحر ده

لمياء...الله يسلمك
شكرا علي مرورك الكريم
و ان شاء الله حنزل جزء من الاجابات دلوقتي

ايمي....انا اللي مش عارف اقولك ايه علي ردك الرائع دا
بجد انتي شخصية تستاهل كل خير

و انا مبسوط جدا انك اخدتي او بتحاولي تاخدي بنصيحتي

ربنا يوفقك يا ايمي و شكرا جزيلا علي مرورك العطر

هاروون....و انت قلبك قاسي اوي اوي
ههههههه
؟؟؟؟؟؟؟؟؟؟؟؟؟؟؟؟؟؟؟

اسف يا جماعة جدا علي التاخير في الاجابات بس دا و الله لظروف الشغل اللي ما يعلم بيها الا ربنا

انا حنزل جزء دلوقتي
و الجزء الاكبر بكرة ان شاء الله

للمياء

ميرسى اوى للكلام الجميل ده الى قلتيه عنى
والحمدلله انى عرفت شخصيه زيك
بجد انتى شخصيه كويسه وطيبه جداااااا
اجاباتك فى العموم جميله وصريحه عشان انا عارفه انك صريحه ومابتعرفيش غير الصراحه فى اسلوب حياتك عموما
ربنا يوفقك يارب

4- كام مره حب ايهاب قبل كده ؟؟؟ وكام مره اعترف هو بحبه قبل ما يتاكد
من حبها ؟؟؟ وهل جرح حد قبل كده ؟؟؟ ام اتجرح ؟؟؟؟من يسكن قلبك ..؟؟

اولا..و قبل كل شئ
الحب من اهم الاشياء في حياة الانسان
و اللي فعلا مجربوش...خسران كثير

احساس مختلف عن اي احساس ممكن تعيشه في حياتك
احساس رغم كل ما قد يسببه من الم في حالة الفشل فيه او في حالة الوداع و الفراق..الا انه احساس مميز و لذيذ

و الحب له نصيب الاسد من الشعر و الاغاني و الدراما العربية و الاجنبية
و دا بيدل قد ايه انه شئ مهم جدا
قد يراه البعض كذلك..و قد يراه البعض غير ذلك
لكني اراه فعلا احساس جدير بتحمل اي مخاطر في سبيله

و علي رأي ام كلثوم...
من غير حب الدنيا دي ايه؟
من غير حب نعيش علي ايه؟

اما بيت الشعر اللي بيلخص كتير من اهمية الحب في حياتنا..
هو للشاعر نزار قباني

الحب في الأرض بعض من تخيلنا...لو
لم نجده عليها لاخترعناه
و مهما قلت و مهما كتبت مش حلاقي كلام اعبر بيه عن اهمية الحب في حياة البشر
ليس فقط الحب بمفهومه العاطفي بين الرجل و المراة
لا..
بل الحب عموما
حب الانسان لأخيه الانسان
حب عمل الخير
حب الحياة
حب العمل
حب الابناء
حب الاب و الام و الاسرة
و اخيرا اسمي انواع الحب

حب الله عز و جل

شفتوا بقي قد ايه الحب مهم في حياتنا؟
و بيساعدنا علي نزع الحقد و الحسد و الكراهية من نفسنا الأمارة بالسوء؟؟

ثانيا..أجابة السؤال الرابع

4- كام مره حب ايهاب قبل كده ؟؟؟
طبعا ممكن بعد الكلام اللي كتبته فوق تقولوا دا الواد فالانتينو و مقطع السمكة و ديلها

لكني هفاجأكم و اقولكم..و لا مرة
مفيش غير مرة من سنتين
و يمكن كنت فاكر انه حب في الاول
بس لما اتعرفت اكتر علي الانسانة دي
اتأكدت انه كان مجرد اعجاب لا اكثر و لا اقل
لأني كنت ساذج لما امنت بنظرية الحب من اول نظرة
و انا عارف طبعا ان الكثير منكم حيختلف معايا في النقطة دي

لكن انا من وجهة نظري انه عشان تحب حب حقيقي لازم تتعرف علي كل صغيرة و كبيرة في الشخص اللي انت بتحبه
لازم تتعرف علي مميزاته و عيوبه

لأني لما اتعرفت علي الانسانة دي..و قربت منها اكتر و عرفت الكتير عنها و عن شخصيتها
لقيت ان عيوبها اكتر بكتير من مميزاتها

غير ان كان في موقف عملته معايا..و مع انها مكانتش تقصد
الا ان الموقف دا كان القشة التي قصمت ظهر البعير
و كانت النهاية

ايه..مبتعيطوش ليه؟
pale

وكام مره اعترف هو بحبه قبل ما يتاكد من حبها؟

بما انها مرة واحدة
و الله انا حكون صريح معاكي و هقولك ان انا كنت قريب جدا من الاعتراف
لكني تراجعت في اخر لحظة
و الحمد لله اني تراجعت
لانه كان هيكون قرار غير موفق لو كنت قلتلها
لانه ببساطة..
مكانش حب

تنفع اسم اغنية..صح؟
lol!

وهل جرح حد قبل كده ؟؟؟
مش عارف....

هقولكم الموقف و انت تحكموا.....

كان في صديقة عزيزة عليا اوي
و كنت بعاملها علي انها صديقة فقط

لان انا مش بتاع حوارات الحب الطياري دي
انا الحب عندي يعني ارتباط رسمي
one emotion....one love........one girl
المهم...
لاحظت ان اهتمامها بيا زاد زيادة عن اللزوم
و انا الصراحة بدات اضايق من الاهتمام الزائد
لدرجة ان في بعض اصحابي فقسوا الحوار
بس انا كنت بحاول استعبط
او بحاول اعمل هندي
لكني وجدت ان مفيش فايدة

فتقريبا قررت هي تقطع جبل الصمت

و كانت الصدمة الكبري..

لقيتها جاية تقولي

انا بحبك و مقدرش استغني عنك

انا تقريبا..وقتها..حسيت ان دماغي اتشالت من راسي
و كأن لساني اتقطع
زي اللي جاتله جلطة في المخ
و كل اللي عملته..اني وقفت ابصلها بذهول زي الاهبل

و سيبتها و مشيت

و فضلت بعدها لمدة يومين..افكر في الموقف دا
و الوم نفسي
علي رد فعلي الاحمق

انا ليه مواجهتهاش باللي قالته؟
ليه مقولتلهاش بصراحة..ان احنا اصدقاء فقط؟

و في نفس الوقت..قعدت أفكر بيني و بين نفسي
جابت الجرأة دي منين؟
اي نوعية من البنات اللي تروح تقول لولد انها بتحبه حتي لو هتموت عليه؟
دا انا اللي ولد معملتهاش

قلت بدل ما أقعد اكل في نفسي
اروح اقولها اللي فيها

روحتلها..و كانت أول كلمة قالتهالي
طبعا..انت بتقول عليا اني بجحة؟

طبعا..انا قولت في دماغي اه
بس قلتلها لأ
الموضوع مش كدة

و قعدت احورلها و اقولها انا مش مهيا نفسيا للحب في المرحلة دي
و ان الاعتراض مش عليها قد ما هو علي الفكرة عموما

حاولت اكون صريح معاها قدر الامكان
و في نفس الوقت حاولت مزعلهاش قدر الامكان

و الحقيقة انها علي غير المتوقع ..تفهمت الامر و استوعبته بطريقة و سرعة تحسد عليهما
و رجعنا اصحاب تاني بعدها

و من ساعتها..و انا اتعلمت اني مهتمش الاهتمام الزائد عن حده عشان موقفي ميتفهمش غلط

بعد كل دا..انا سايبلكم الحكم

تفتكروا..هي اتجرحت في قرارة نفسها؟
أم ..لا

ام اتجرح ؟؟؟؟
لا...الحمد لله مفيش

من يسكن قلبك ..؟؟

الحب القادم

5- لو اعترفت بحبك ل ولحده ولكن عرفت بعد كده انه مجرد اعجاب بس بعد

ما هي اعترفتلك كمان بحبها بس انت مش تقدر تكمل لانه مجرد اعجاب

هتعمل ايه ؟؟؟؟؟ رغم انك اللي معترفلها في الاول

الجزء التاني من السؤال أعتقد اني جاوبت عليه فوق
أما الجزء الأول..فأنا زي ما وضحت فوق انه كاد ان يحدث في تلك المرة و لكنه لم يحدث

و دا استحالة يحصل...لاني عمري ما اعترف لواحدة اني بحبها من غير ما اكون اتأكدت فعلا اني بحبها

و لو حصل_ودا مسبعد_فبمنتهي البساطة هصارحها بالحقيقة..لان الحاجات دي مفيهاش لعب او مراوغة

و لو اتأكدت ان الحب من طرفي انا بس..هنسحب بمنتهي الهدوء..و دا حيكون بعد محاولات كتير اني اظهر حبي دا في صورة اشياء كثيرة..و لو تأكدت ان مفيش فايدة..خلاص يبقي عملت اللي عليا و دا من الاساس

مينفعش يبقي اسمه حب

6- اعتذار تريد ان تقدمه لمن ..؟؟

لست الحبايب..مع ان جزء كبير من اللوم يقع عليها في موقف ما
بس مش مشكلة..المسامح كريم

7- ما ردة فعلك عندما يقول لك حبيبك : أحبك نعم أتزوجـــك لا ..؟؟وهل طابع الرجل الشرقي هيكون له اثر كبير في الرد و الموقف ؟؟؟؟

سؤال غريب جدا...
و عمري ما فكرت فيه

مع ان المفروض العكس هو اللي بيحصل

أتزوجك نعم
أحبك لا

يعني ممكن 2 يتزوجوا.و ميكونش بينهم اي حب او عاطفة او مشاعر
و ممكن نجد ان مع مرور الايام و تعرفهم اكثر علي طبائع و صفات و اتجاهات و مميزات كل منهم
ممكن نلاقي ان الحب بدأ يجد طريقه الي قلبيهما

و ممكن العكس
و دا اعتقد انه اللي غالب

2 اتجوزوا مبيحبوش بعض و يفضلوا مع مرور السنين و الايام لم تتحرك بينهم اي مشاعر او عاطفة
و ممكن كمان يكرهوا بعض اكثر..
و يلعنوا اليوم اللي شافوا بعض فيه
حتي لو بدون سبب واضح

و دا بيرجع لعوامل كتير..منها استعدادهم النفسي..و شخصية كل منهما..و ظروف الحياة التي يعيشونها

أما ان يكون في أحبك اه...اتزوجك لا
فهي مع انها حالات نادرة جدا

الا انها صعب تتقال
و بتكون غالبا نتيجة ظروف و قيود مادية و اجتماعية ليس هنا المجال لذكرها

بس انا رأيي واضح...ان الحب الذي لا يؤدي الي تتويج بارتباط رسمي..لا يعتبر حب
انما مجرد علاقة عابرة
أو قصة حب فاشلة

يتفق معي من يتفق و يختلف معي من يختلف

يعني في موقف زي دا..انا هلاقي نفسي مضطر انهي العلاقة دي

لان ايه فايدة انك بتحبيني طالما اني عارف و متأكد ان انا مش هنكون لبعض

وهل طابع الرجل الشرقي هيكون له اثر كبير في الرد و الموقف ؟؟؟؟

و أكيد طبعا الرجل الشرقي اللي انا واحد منهم
مش هيتقبل الوقف
و هتثور نفسه لمجرد اجابة بهذه الطريقة و بهذه القسوة
بس أرجع و أؤكد ان الاستجابة هتختلف من شخص لأخر

و لو انها هتكون في المطلق و الغالب ثورة عارمة من الرجل الشرقي

او اذا نظرنا من نافذة اخري

انه من الممكن انه يحاول يتعرف علي اسباب هذه الاجابة
فاذا وجد ان الاسباب قابلة للتغير سواء كانت في شخصه او في اوضاع محيطة به قادر علي تغييرها..فلم لا يحاول تغييرها بشرط ان يكون مقتنع هو الاخر بطريقة تغييرها,,,,,

اما اذا كانت الاسباب و الظروف خارجة عن ارادته,,,فعليه جاهدا ان يحاول نسيان هذه العلاقة
لانها مثل الشعاع الذي ليس له نهاية معروفة

و بكدة تكون خلصت اجابة الجزء بتاع النهاردة..انتظروا جزء أكبر غدا باذن الرحمن

ايهاب
رغم اننا ماتكلمناش كتير لكن انا بحترمك بجد وشخصيتك فعلا رائعه وانا مبسوطه اننا كسبنا فى المنتدى والكليه شخصيه زيك
وبشكرك على توضيحك لشخصيتى
لكن انا احب اوضح الكلام الى دار بينا عن المنتدى بالظبط منعا لسوء الفهم
وقت ماكنا بنتكلم كان المنتدى مفيش حد بيدخل كتير من الاعضاء والمواضيع قلت انها متكرره وده فعلا حصل وكمان قلتك انا مش عايزه ادخل المنتدى عشان مش حديله زى ماكنت بديله قبل كده وانا مرضاش ان مستوى مواضيعى يقل لمجرد انى انزل مواضيع وخلاص وسالتك عن احوال المنتدى بصفه عامه
ولو فى حاجه تانيه انت شايف انى قلتها طبعا اتفضل قلها

بجد بشكرك مره ثانيه لثقتك الغاليه( ياكاتم الاسرار)
منتظرين باقى اجاباتك ربنا معاك
اجاباتك بجد جامده اوى فى انتظار الباقى

و بالمناسبة...احب انتهز الفرصة و اسيح و اقول ان سارة اخر مرة شافتني قالت فيها انها مش ناوية تدخل علي المنتدي تاني
ليس اعتراضا علي الاعضاء...قد ما انها حاسة ان المنتدي بقي ممل و دا طبقا لكلامها

و انا مؤيد كلامها صراحة...لان حتي الكام عضو اللي كانوا بيدخلوا و منشطين المنتدي

معادوش بيدخلوا

و نوعية الموضوعات نفسها مبقيتش تشد زي الاول

بس يا سارة..انا بنتهز الفرصة و اقولك ان المنتدي بجد اتأثر بغيابك عنه لانك احد افضل اعضاء المنتدي

يا ريت ترجعي تنوري المنتدي من تاني

شفتي انا بكتم السر الذاي؟
ههههههه

أولا..يا سارة انا سعيد جدا انك رجعتي تنوري المنتدي من تاني

ثانيا..الكلام اللي انتي قلتيه فوق في ردك علي الموضوع مش مختلف عن الكلام اللي قلته في الكرسي

و بعدين..انا رجعت وضحت معني كلمة ممل اللي جات في كلامي
و اللي زي ما وضحت بعد كدة في ردي ان قصدي بيها
عدم دخول الأعضاء النشطين
و نوعية الموضوعات التي كانت تطرح

و بالنسبة لكلامك..فانتي فعلا مقلتيش اكتر من كدا

و الا انتي عارفة انا بحافظ علي الاسرار قد ايه

كنت طبعا هحتفظ بيها علي طول لنفسي

و بجد مش عايز اقولك المنتدي عمل قفلة من كتر النور لما دخلتي

هههههههههه

و مفيش سوء تفاهم و لا حاجة

لأن كلامي كان واضح و بعيد عن الألغاز

نورتي يا سارة

و شكرا علي رأيك في الأجابات

دا بعض مما عندكم

انا دلوقتي هنزل جزء كمان من الاجابات
ياللا بينا

8- ماذا ستكتب لنا لتعبر عن حياتك التي عشتها الى الان في كلمات قليله ..؟؟

بدون تفاصيل و اشياء لا داعي لذكرها
حياتي بها العديد و الكثير من الاضطرابات
حياة في المجمل قد تكون مثل حياة اي شاب في مثل عمري
لكنها تختلف من نواحي اخري
سعدت و حزنت
ضحكت و بكيت
فرحت و تألمت
نجحت و فشلت
صعدت و هبطت
تفائلت و تشائمت
مثلي في ذلك مثل الجميع

حياتي بها مشاكل..كان يمكن تفاديها و بمنتهي السهولة لولا غباء و سذاجة الأطراف المعنية بها
احيانا اري المستقبل مظلما,,و احيانا اراه مشرقا
مازال الغموض يكتنف حياتي
و مازال الوقت مبكرا للحكم علي الحياة
و مازال مبكرا الوقت لتحديد معامها وخططها

فكل مقدر و مكتوب عند الله عز و جل
و كل مرهون الان و في هذه اللحظة بمدي التزامي دينيا و اخلاقيا و دراسيا
هذا هو المطلوب مني الان

لكن بمنتهي البساطة..كان من الممكن ان تكون العشرين عاما و التي هي عمري
كانت من الممكن ان تكون اكثر اشراقا

9-

اذا اردت ان تبكي الان , فعلى من تبكي ..؟؟من ستختار ليمسح دموعك ..؟؟و متى اخر مره بكيت ..؟؟

انا من الاشخاص اللي من الصعب ان لم يكن مستحيل ان تنزل دموعهم

و حاليا..لا اريد البكاء علي احد

لانه لا يوجد من يستحقها

و معتقدش يا لمياء دلوقتي في الزمن دا ان في حد بيمسح دموع حد

انا هخلي الايام هي اللي تمسح دموعي لانها الوحيدة الكفيلة بمدواة الحزن

اخر مرة بكيت و دي المرة الاولي يجي من سنتين

كانت من 3 اسابيع تقريبا

لما جدي تعب و جاتله جلطة في المخ
(عفاكم الله)

و رحنا بسرعة نزوره

اول ما دخلت عليه...منظره كان يقطع القلب و انا الصراحة مقدرتش امسك نفسي

لأن كل اللي بيعمله ..انه كان باصص في السقف و مش مدرك حتي مين اللي حواليه

حسيت وقتها ان الانسان قدام المرض عموما و لحظة الموت خصوصا
لا يساوي شيئا

و قعدت فكرت لو الانسان عارف انه ممكن تجيله لحظة زي دي
و الله العظيم ما يعمل اي ذنب في حياته حتي لو ذنب صغير

الله يرحمه و يسكنه فسيح جناته

10- لو خيروك بين حبيبتك وبين اعز صديق فمن تختار ..؟؟

بس الحبيبه هنا اللي اخترتها زوجه المستقبل

السؤال دا قتل بحثا
و مستحيل افرط في واحد من الاتنين
و فعلا بجد مش حقدر اتنازل عن اي حد فيهم
و معتقدش ان في ممكن موقف يحكم الواحد انه يخليه يتنازل عن حبيبته مقابل صديق عمره
لأن مفيش صلة او روابط او علاقات بين الاتنين
و فعلا موقف زي دا من اصعب المواقف اللي ممكن يتحط فيها انسان

11- هل تعتقد ان حظك سيئ ..؟؟
جدا و لأقصي درجة ممكن تتخيلينها و حتي في اتفه الامور تلاقي الحظ معاندك و تلاقي الامور كلها ماشية عكسك
يعني ممكن تسميني بومة من الاخر
وهل تعتقد ان سعيد الحظ في الحب تعيس الحظ ف المال و الشغل ؟؟؟
لا...نعكس السؤال

تعيس الحظ في الحب...لاني لم اقابل الانسانة التي اتمناها الي الان
مش عارف دا سوء حظ و لا لسة مجاش الميعاد

و مؤخرا..سعيد الحظ الي حد ما في الشغل و المال برغم عذاب الشغل
الا اني اتعرفت علي ناس كتير هناك
و اتعلمت حاجات كتير
و عرفت ناس شغالة في مجالات سياحية
و فهمت حاجات في المعمار و البناء و الهندسة

مع اني بقيت شبه زنوج امريكا
بس مش مهم
كله بيطلع في الغسيل
وهل فعلا المراه ممكن تكون هي سبب سعاده الرجل وحظه ؟؟؟

وراء كل رجل عظيم امراة...نكمل المقولة
اذا كانت محفظته في جيبه الخلفي

هههههه

المراة ممكن تكون سبب سعادة الرجل..لو بتحبه و بتعاملة كويس و بتتقي الله فيه و في بيته و في ولاده
و لو محافظة علي فلوسة
لو قايمة بدورها علي اكمل وجه
لو في وجهها ابتسامة
لو بتخاف عليه
لو بيخططوا للحياة سوا

و صراحة نسبة لا بأس بها من النساء المصريات يفعلن ذلك

و علي النقيض تماما
بقي
الوش التاني

ام قويق..تتجسد في صورة المراة النكدية
العبوسة
كل شوية عند مامي في البيت
قطمت وسط الراجل طلبات و هاتلي و هاتلي و اشمعنا فلانة و اشمعنا علانة
لو مهملة حقوقه..
لو مهملة في حق نفسها
لو علي طول خناقات و زعيق في البيت

هنا الراجل بيكره نفسه و بيكره حياته و بيكره اليوم اللي شافها فيه و بيكره اللي اتوسط في الجوازة من الاصل
و في الغالب بيروح يتجوز عليها
يعني هي الخسرانة في الاخر

اذن يمكن القول ان المراة هي رمانة الميزان
بقليل من الذكاء يمكنها اكتساب الرجل و احتوائه و تكوين اسرة سعيدة

و العكس صحيح

يبقي هنا بيتضح دور المرأة المهم في حياة الرجل

يا تكون عنصر هدم
او عنصر بناء

عوامل نحت و تعرية
او عوامل ترسيب

لكننا في مصر غاليا عوامل التعرية عندنا كتير اوي
و النموذج الاول هو اللي منتشر اوي

و مش شرط يكون ظاهر بصورة رسمية

لكن ممك يكون 2 عايشين تحت سقف واحد
و ميكونش ليهم علاقة ببعض

يبقي فعلا..المرأة اكثر من نصف المجتمع

لكن لو ادت دورها بالشكل الصحيح

Very Happy

و بكدة نكون خلصنا الجزء الخاص باليوم

انتظروا باقي الاجابات غدا ان شاء الله تعالي

اجابات جميله اوى وخصوصا رأيك فى المراه اذا كانت سبب السعاده
ربنا يوفقك وتحقق الى تتمناه وماتحسش ان حظك وحش كلنا بنقابل مصاعب وده نصيب وربنا بيقدملنا الخير فى وقت احنا لسه مش عارفينه هو الى كاتبه لينا
منتظرين باقى الاجابات يا ايهاب

ربنا يخليكي يا سارة
شكرا علي تمنياتك و دعواتك و مرورك العطر

و فعلا عندك حق لان محدش بياخد اكتر من نصيبه

و شكرا علي رأيك في الاجابات

و ان شاء الله هنزل جزء من الاجابات النهاردة

انا دلوقتي هنزل جزء لا بأس به من الاجابات
ياللا بينا

و اتمني تكون الاجابات عند حسن ظنكم

هل هزمك حزنك في يوما من الايام ..؟؟

لا...هو مش لدرجة هزمني
بس سيطر عليا في كتير من الاوقات
و لو انه مبيستمرش كتير
و بيظهر من وقت للتاني

و لازم الواحد يتعامل مع احزانه
و لازم يتغلب عليها و يخرج منها
و ميديهاش الفرصة انها تحطمه

و الحمد لله بالرغم من المشاكل اللي في حياتي
الا ان مفيش حاجة نجحت انها تحطمني

وهل كان الحب هو السبب؟؟
لا...طبعا مش الحب
لانها كانت مرة واحدة بس
و مكانتش حب
يمكن اعجاب
يمكن تعود
لكنه مكانش حب
و مكانش فيها حزن و لا حاجة
خلصت بهدوء و من غير مشاكل
و مكانش فينا حد زعلان من التاني

او المرأه ؟؟؟؟

لا برضو لسة مخدنهاش دي

13- اي الدول تتمنى ان تزورها ..؟؟ ولماذا ؟؟؟

ايطاليا في المقام الاول

انا عموما احب اي شئ يتعلق بايطاليا بدءا من منتخبها الكروي اللي بموت فيه
مرورا بنادي ميلان اللي بشجعه اكتر من الاهلي
و مرورا بالازياء الايطالية
و الحضارة الرومانية المتجسدة في العديد من المعالم مثل الكولسيوم
و نفسي تحديدا ازور
fontana di trivi
او نافورة العشاق
و طبعا مدينتي
ميلانو...و جنوة..و العاصمة روما
و وصولا الي الماكولات الشهية المتخصصين فيها
من غير لك كتير
فعلا نفسي ازور البلد دا جداااااااااااااااااااا

اما البلد الثاني
فهو اليابان
بلد الطبيعة الخلابة الساحرة
بلد ناطحات السحاب
نفسي اروح اليابان و اشوف الابراج و الانهار و القطارات و الطراز المعماري المختلف تماما
في البناء بالنسبة لليابان عن اي بلد اخر

الاشجار و الجبال و الشلالات
مطاعم السوشي

نفسي اروح حتة اسمها
اوساكا

هذه المدينة هي قلب اليابان
تاريخيا..و سياسيا ..و ثقافيا

ياااااااااااااه
لو معايا تذكرتين سفر لأي بلد من الاتنين دول

14- هل انت راضي عن نفسك ..؟؟
الاجابة بمنتهي البساطة
لالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالا
و لا حتي بنسبة 30 في المية
لاسباب و مشاكل كتير ليس هنا المجال لذكرها
منها ما يتعلق بي
و الاخر ليس له دخل بي

وايه اكتر حاجه بتحبها في ايهاب ؟؟؟
الطيبة
حب المساعدة و الخير للاخرين
الثقافة بعض الشئ

وايه اللي بتكره في ايهاب ؟؟؟؟

العصبية الزائدة
و سرعة الانفعال و القفش

و اللي مسببة لي مشاكل كتير سواء مع اهلي
او مع معارفي
او مع اصحابي
او حتي في الشغل.. اللي مبقاليش فيه اسبوعين

لكن ساعات بتمالك نفسي
و بتكون عندي سعة صدر معرفش بتيجي مني
الا انه في المجمل الموضوع دا بدا يقل كتير عن الاول

15- هل تعترف بشيء اسمه الصداقه بين الرجل والمرأة ..؟؟اه ولا لا ؟؟؟؟

اه..طبعا نعم
اعترف بصداقة بين الرجل و المرأة
طالما في حدود الادب و الاحترام المتبادل

بس مش اي رجل
او اي مراة ينفع معاهم موضوع الصداقة
و عن تجربة اقدر اقولك كدا

لان في ناس ممكن تفهم الصداقة غلط و تترجمها لاشياء اخري

و بصفة عامة انا اعترف بيها اه
لكن مبحبذهاش اوي
او بقيت مبحبذهاش اوي

و زي ما قلت الصداقة بين الرجل و المرأة تتطلب
قدر كبير من النضوج العقلي و الفهم للامر الواقع

و ان محدش يتعدي حدوده
او يتعدي الخطوط الحمراء

و بصفة عامة في مجتمعنا الشرقي ممكن الرجل بالذات يترجم الموضوع دا غلط
او يدي نفسه اكبر من حجمه ووضعه
و يبدا يدخل موضوع الصداقة دا في اطر و اتجاهات اخري
و دا اللي خلي المرأة دلوقتي متشددة جدا في موضوع الصداقة مع الرجل عموما
و مش اي واحدة ممكن يبقي لها صديق رجل
لان معظم النساء بتخاف من الموضوع دا
و الصراحة عندهم حق

و دا عكس تماما المجتمعات الغربية
و اللي فيكم بيشوف افلام اجنبي هيفهم انا قصدي ايه

وهل لو لا ده عيب من الرجل انه مش بيعرف يحافظ عن المرأه ام العكس؟؟؟؟

زي ما قلت انه عيب من الرجل انه بيسئ فهم الأمور
و بيدي نفسه اكتر من صلاحياته
و ممكن يخرج خارج
حدود الصداقة

16- هل كنت السبب في يوما من الايام ان تدمر حياة شخص سواء العمليه او الاجتماعيه او العاطفيه ..؟؟

لالالالالالالالالالالالا

الحمد لله رب العالمين

موصلتش للدرجة دي ابدا

و بعدين يا لمياء انا لسة 20 سنة

يعني لا املك لا الادوات و لا القوة و لا السلطة لفعل ذلك

و لا حتي _الحمد لله_النفس الشريرة او النفس الخبيثة التي يمكنها فعل ذلك

و عمري ما احاول اعمل شئ قبيح زي دا في حياتي
بل انا علي العكس تماما
بحب اخدم جدا
و بحب اساعد جدا
و من النوع اللي بيتمني الخير للاخرين

وهل كانت المراه سبب في تدمير جزء من حياتك ؟؟؟؟

لا برضو..محصليش الشرف
و بعدين انا موصلش نفسي ان في واحدة مهما كانت مين

ليه يعني؟

و علي ايه؟

و ايه اللي يوصلني للمرحلة دي؟

انها تنجح او تفتكر انها دمرت جزء من حياتي

و مش المراة بس

بل اي انسان عموما

لان انا ببساطة مسيبش حقي ابدا

و للاسف فانا الانتقام عندي صعب جدا خاصة ممن اخطا في حقي و يا سلام بقي لو كان الخطأ لا يغتفر

و اللي يعرفني عن قرب يفهم كلامي

17- هل انت مدمن تفكير ..؟؟

لا.......مش لدرجة الادمان
بس لما بستغرق في التفكير في اي امر
بنعزل تماما عن العالم المحيط بي
لان انا عندي التفكير شئ مهم
و بيبينلي اشياء و حقائق كتير
خاصة لما تكون الاستنتناجات صحيحة
و التفكير عموما مهم و عنصر اساسي جدا في حياة الانسان
و هو اساس التقدم و التنمية وراحة الانسان عموما

لان دا الفرق بينا و بين الالة

العقل و التفكير

من هو اكثر شخص تفكر فيه ..؟؟

للأسف مش هقدر اقول
لكن كل اللي بفكر فيه هو اختفائه من علي وجه الدنيا

مش بفكر فيه عشان معجب بيه و لا عشان سواد عيونه
انا كل لحظة بدعي عليه
و بتمني ان ربنا ياخده

و بستغل الفرصة
و اقول..ربنا ينتقم منه

طبعا انتم دلوقتي ايه اللي يوصل واحد صغير في السن
انه يتمني المكروه لشخص ما مهما كان

لكن الشخص دا عمل معايا موقف عمري ما هسامحه طول ما انا عايش
و عمري ما لساني هيخاطب لسانه
و لو شفته متقطه 100 حتة قدامي
و الله العظيم ما هتأثر

و انا تمنيت اني مكنتش قابلته من الاساس
و بالرغم من كل ما فعلته معه من مواقف سخيفة و مؤلمة و مؤذيه لهذا الشخص

الا انها لم تشف غليلي

طبعا انتم متخيليني في صورة مصاص دماء

و بتسألوا نفسكم عن ما هية الشخص و ما هية الموقف الذي يسبب كل هذا الحقد و الكراهية

سأترك هذا لخيالكم

18- اذا تم تعيينك ملكا لجميع البلاد العربيه فما اول قرار ستتخذه ..؟؟
ومن هي الشخصيه التي تحتاجها مصر في نظرك؟؟؟

ملك حتة واحدة
و لجميع الدول العربية

ايه رأيك بقي اني هلغي الملكية اساسا
و هخلي نظام الحكم جمهوري ديمقراطي

و هلغي الملكية من مصر
و هخلي نظام الحكم جمهوري ديمقراطي
ههههههههههههههههههههههههههههههههههههههههههههههههههههههههههههههههههههههههههههه

اول قرار هتخذه
دي مجموعة من القرارات
الاهتمام بالقطاع الصناعي في جميع الدول العربية
استغلال المساحات الشاسعة الغير ماهولة بالسكان خاصة في بلد زي السودان
مساحته اكتر من 2 مليون كيلو متر مربع
القضاء علي العشوائيات في جميع الدول
تحسين نظم التعليم في جميع الدول العربية و القضاء علي الامية من جذورها
انشاء ما يسمي بالجيش العربي الموحد بتكوين الجيش عن طريق اختيار عدد معين
من خيرة الضباط و العساكر في كل دولة لتكوين جيش عربي موحد علي غرار الخلافة الاسلامية و يكون مقره في مصر

و لو انه قرار خيالي جدا و صعب يتحقق لاعتبارات عديدة الا اني نفسي جدا يتحقق

الاهتمام بسداد الحد الادني من الكفاف للمعدمين
ارسال مساعدات لدول افريقيا التي تعاني من المجاعات و الاوبئة

محاولة حل المشكلة العراقية(التي اري بوادر انفراج في الازمة بعد مجئ باراك اوباما)
حل المشكلة الفلسطينية و محاولة انشاء وطن قومي فلسطيني بعيدا عن اسرائيل

هيهات..كلها اوهام

و في قرارين نفس اعملهم في مصر

تقنين سلطات ضباط الشرطة و معاقبة المخطئ فيهم
الغاء التوك توك
ههههههههه

اما عن الشخصية التي تحتاجها مصر
فلو قصدك بالنسبة للرئاسة و الحكم عموما

فالشخصية هي
انور السادات
الله يرحمه

لو ان سيادة الرئيس مبارك مش مقصر معانا في حاجة!!!!!!!!!!!!!!!!!!!!

اما لو وزير فهو برضه وزير سابق
و تحديدا وزير داخلية
من الناس الشرفاء اللي مسكوا المنصب دا
و الشخصية هي

سيادة الوزير السابق
احمد رشدي

اللي فعلا الوزارة دي بالذات وصلت لاوج عظمتها في عهده
و لو ان سيادة الوزير حبيب العادلي قايم بالمهمة علي اكمل وجه!!!!!!!!!!!!!!!!

19- لمن تهدي هذه الكلمات

مستحيل انساك
جدي الله يرحمه

اتمني ان اراك ثانيه
مفيش حد معين

اللي راح راح وما تفيد كلمه ياريت
لنفسي

انت كل شئ في حياتي
والدتي

لا حياه لي بدونك
الاكسجين
هه
مفيش حد مهما كان مقدرش اعيش من غيره لو سابني
لان الحياة لا تتوقف عن اي حد
او اي موقف

منك لله
الشخص اللي حكيتلكم عليه فوق

الله يسامحك
ابن عمي

و بكدة نبقي خلصنا الجزء بتاع النهاردة

انتظروا جزء جديد غدا

ايهاب صبرى بيلبغكم و بيبلغ اعضاء المنتدى ان بعد كده الاجابة حتبقى فى يومين
و اربع عشر سؤال بس

طب و هو فين صبري..
و ليه مقلناش بنفسه؟
و لا هو مسافر السعودية مثلا؟

هو سيادتك المتحدث الرسمي مثلا..

و بعدين انت بتقولي انا الكلام دا ليه؟

انا من بقالي اسبوعين في ام شغل و مبفضاش غير النهاردة بس و جزء من يوم الخميس

و بحاول انزل علي قد ما اقدر و الله
يعني كتر خيري

و الاخر اديني عمال اكلم نفسي في ام الكرسي و مفيش حد بيرد
اللهم الا سارة بس هي اللي ردت
من بعد ما اسئلة الاعضاء خلصت

معادش حد بيدخل تاني

و كأني يعني مش عارف اجابة الاسئلة دي و بكتبها لنفسي

يعني همتحن فيها مثلا؟

خلاص..و علي رأيك انا ايه اللي يجبرني ارد علي حاجة محدش مهتم بيها

يعني انا اليوم اللي بنزل فيه بدل ما بضيعه عالمنتدي و قدام النت

طب ما انا اخرج و انزل اشوف اصحابي احسن

يا راجل اقعد ساكت بلا حرئة دم

~*كرسى الاعتراف*~

~كرسى الاعتراف~