~*كرسى الاعتراف*~

تذكير بمساهمة فاتح الموضوع :

لالالالالالالالالالالا
حرام والله
قرعة اية
انت كنت عايز كدة من الاول
طيب والنبى الرحمة عشان عندى امتحانات
وشكرا على الاختيار الفظيع دة

اوشين ميرسي ليكي انتي يا قمر
واكيد ايهاب ما أخدش باله
ومتهيألي هو كاتب الاعضاء اللي انا شفتهم يوم الخميس الماضي
وزي انا ما قلت
انا شيفاكي انسانه رومانسيه ، وواثقه من نفسك
ومواضيعك روعه جدا
ومن الاعضاء اللي بنتظر مواضيعهم واللي نفسي اتعرف عليهم شخصيا

ثانكس اوشين والكرسي منور بوجودك

ميرسى جدا لرأيك يا رباب
و احترامك و تقديرك ليا
و اكيد طبعا المنتدى نور اكتر بوجودك و انتى اضفتى عليه طابع مميز
اما بالنسبة ف ان ايهاب مأخدش باله
ده شئ ميعلمهوش غير ربنا و انا اصلا مش زعلانة
لأن كفاية اللقبين اللى انتى جطيتى اسمى تحتهم
ده لوحده كفاية و تقدير منك اشكرك عليه
و انا كمان نفسى اتعرف عليكى شخصيا جدا
و ميرسى جدا لاهتمامك
انتى فعلا شخصية جديرة بالاحترام
ثانكس

اوشين
ربنا يخليكي يارب علي رأيك الجميل

و انا كمان نفسى اتعرف عليكى شخصيا جدا
و ميرسى جدا لاهتمامك
انتى فعلا شخصية جديرة بالاحترام
ثانكس
واكيد انا واثقه ان ايهاب ما كنشي قصده
واهو قالك بنفسه وانا عارفه انك مش زعلانه


انتظروا بقيه الاجابات

ورجعت من تاني علشان استكمل إجابات الاسئله



ثالثا...الاسئلة الشخصية




4-يوم في حياتك من الاول للاخر في الاجازة


بص هو الاجازه السنه دي ممله جدا جدا يعني الايام كلها شبه بعضها

انا بقوم من النوم اصلي الظهر وارتب غرفتي ومش بفطر دايما لاني بصحي من النوم متأخر طالما مافيش ورايا حاجه وبعدين بصلي العصر وبعد كده اتغدي واعمل اللي ورايا في البيت وبعدين بتفرج علي التليفزيون واصلي المغرب والعشاء و بستني حد يتكرم ويقوم من علي الكمبيوتر ولما ربنا يشاء اني اقعد وده غالبا بيكون في التلت الاخير من الليل بفتح المنتدي وبقرا المواضيع لحد ما اصلي الفجر واقعد شويه وادخل انام .

بس الحمد لله ما بيعديش عليا يوم في الاسبوع إلا واروح فيه للبحر من بليل للصبح اصل انا بحب البحر اوي .... ولو كان في اي مكان اروحه بروحه سواء للعائله او اي مكان

بس اليوم المعتاد بيكون كده ممل...وبس


5-الاهتمامات

الهوايات.......................................



بحب احفظ القران بس الصراحه قطعته لما دخلت الكليه بس ان شاء الله في اقرب فرصه هرجع له تاني / وبحب الغناء جدا اصلهم بيقولوا ان صوتي حلو فعلشان كده علي طول داوشاهم في البيت / يعني وساعات بحب الكتابه والرسم .......

اللون المفضل................................

البرتقالي ، الاخضر ، الزهري علي الترتيب

المكان المفضل)...............................

اكيد طبعا البحر وخصوصا عند القلعه

المطرب المفضل.............................

مصطفي كامل ، وائل جسار ، وكتييييييييييييير
المطربة المفضلة......................


اصاله ، شيرين ، جنات


الاغنية المفضلة.................................

كتيييييييييير اوي

وخصوصا قد الحروف و حبك حقيقه و اادي اللي كان


الممثل المفضل...............................

اكيد طبعا احمد السقا و احمد حلمي وكريم عبد العزيز ومحمد رجب

الممثلة المفضلة..............................

مني زكي ، مي عز الدين ، ياسمين عبد العزيز

الفيلم المفضل...............

كل افلام الممثلين اللي فوق وخصوصا

تيمور وشفيقه و الداده دودي و1000 مبروك وعمر وسلمي الجزئين

الاكلة المفضلة...........

المكرونه بالباشميل ، الملوخيه ، صينيه البطاطس بالفراخ في الفرن

اكيد طبعا جوعتكوا

المشروب المفضل........

عصير المانجو والجوافه

العطر المفضل................................

new skeap


المسلسل المفضل.........................

المسلسل التركي نور

القناة التليفزيونية المفضلة................


قناه موجه كوميدي ، زي سينيما للافلام الهندي ، وقناه أقرأ برنامج خدعوك فقالوا لمصطفي حسني ...


الكتاب المفضل.............................

طبعا القران الكريم والكتب الدينيه وساعات قصص الرعب

الصديق المفضل ............

صديق مافيش بس بعد ما اتعرفت عليكوا ان شاء الله هيبقي فيه كتير


والان صديقي ربنا

الصديقة المفضلة ...........

طبعا حبيبتي مريم وروح قلبي

ودي اكتر من اختي


الحيوان المفضل...........................

القطط ، والارانب

الطائر المفضل...............................

البغبغاء

وده جزء من الاجابات وادعولي ربنا يعيني علي اللي جاي

متهيألي ان ده اكبر واصعب جزء انا جاوبت عليه وتعبت فيه
وربنا وحده اللي يعلم اني كنت صريحه فيه مع نفسي قبل ما يكون معاكم



-لو قالولك اختاري وزارة تمسكيها لمدة اسبوع ؟؟؟ تختاري وزارة ايه؟ وليه ؟ وهتعملي ايه في الاسبوع ده؟سؤال حلو اوي بس فعلا لو كان عندي فرصه اني ابقي وزيره حتي ولو لمده اسبوع هــــرفــــض

لاني هخاف ربنا اني اتحمل كل المسؤليه دي ، مش هروب ولا حاجه بس مسئوليه كبيره هتسأل عنها يوم القيامه قال )ص (
" كلكم راع وكلكم مسئول عن رعيته "

بس ممكن ابقي استشاريه يعني اختار وزاره العدل ، وهختارها لسبب انها بقت وزاره الظلم



هحاول اعرف التقصير منين واحله ، وهخلي فيها قسم للرحمه ، وقسم للمقارنه بين القضايا

يعني لو اللي اتقتلت بنت وزير تبقي زيها زي بنت الغفير

مثلا في قضيه سوزان تميم شفنا ازاي اعطوها اهتمام كبير وليه حتي مش علشان القتيله ولكن بسبب القاتل والمحرض علي القتل

واني شاهدت جريمه مشابهه علي قناه دريم 2 بفتاه قتلها زوجها ومثل بجثتها ودي اشنع جريمه علي الاطلاق وفي النهايه رمي القاتل حثتها الممزقه في صندوق القمامه وهرب بره مصر قد كده بقينا رخاص وان النيابه كان عندها صور للقاتل ولكن لم يعرضوها في الصحف

يعني اكيد البنت دي مش اقل من غيرها ولحد دلوقتي القاتل الجبان لسه هربان اكيد في حد سانده



انا اسفه إذا كنت طولت عليكوا في السؤال ده بس القصه دي تحرق دم اي حد

ودي نقطه في بحر الجرايم الاخري

علشان كده انا بقدم استقالتي قبل ما أقعد علي كرسي الوزاره

7-حكمة تؤمنين بيها وترددينها دائما ؟


" لا تكن صلبا فتكسر & ولا تكن لينا فتعصر "


8-موقف تمنيتي ان يعود بك الزمن 5 دقائق للوراء كي لا تفعليه مرة اخري...ما هو؟


مش عارفه اصل انا اكتر حاجه بكرهها الندم واكتر كلمه بكرهها بردوا كلمه ياريت

هو في موقف حصلي امبارح اني كنت ماشيه انا ومريم زميلتي في الشارع وقابلنا باباها وهو رجل ملتحي فبالتالي مش بيسلم علي البنات وانا نسيت الحكايه دي ومديت ايديا علشان اسلم وطبعا بم انه انسان عنده ذوق سلم عليا وهو مدخل ايديه جوه القميص وانا اتحرجت جدا وفعلا اتمنيت اني ما كنتش عملت كده ....... وبس


9-رؤيتك لذاتك

انا وأعوذ بالله من قول انا انسانه عاديه جدا زي اي بنت بحس ان انا طيبه اقل كلمه ترضيني

ودمي خفيف ههههههههه بحب الخير وبكره العنف جدا جدا وممكن من عيوبي ان انا

جبانه جدا وخوافه جدا وبتكسف من خيالي اه نسيت وبخاف من الصرصار هههههههه

وعلي فكره مش بهزر بجد يمكن اكتر حاجه بخاف منها


هل تعتقدين ان حظك سيئ؟

لا طبعا والدليل علي كده ان ربنا والحمد لله خلقني مسلمه ، حتي ولو كان حظي سيئ الان ان شاء الله ربنا هيعوضني ... وانا راضيه الحمد لله بحالي وبحمد ربنا واشكر فضله إن انا احسن من ناس كتير.


هل انتي...ايجابية؟



اعتقد ان الغالبيه العظمي اه يعني تقدر تقول 90% ايجابيه لاني حاسه اني لسه ما خضتش التجارب اللي تعرفني سواء كنت ايجابيه ولا لأ ... بس انا ايجابيه في الحق يعني اللي غلطان بقوله انت غلطان واللي ازعل منه اقوله انا زعلانه منك في وجهه علشان ميفهمش تغيري معاه غلط...

أما بقه الجزء السلبي ممكن يكون في التسرع في الرد لاني متسرعه بعض الشئ والسبب في كده اني بكون مظلومه يعني الغلط من اللي قدامي مش بيفهمني صح أو يمكن انا اللي مش بوصل المعلومه صح بس الحمد لله اتغلبت علي المشكله دي وبقيت بفضل الصمت والسكوت بدل ما أتفهم غلط واتعب نفسي في اني اشرح للي قدامي وجهه نظري .


هل انتي رومانسية؟



انا إلي الان ما جربتش معني الكلمه دي بس اللي حساه انها كلمه ما ينفعشي تعبر عنها بالكلام لانها تتحس وبس . بس انا رومانسيه وهاديه مع نفسي وبحب الاغاني الرومانسيه والافلام الرومانسيه اوي بقعد اتخيل نفسي فيها وبحس بأحساس مش قادره اوصفه

ربنا يوعدنا بس يكون في النور مش زي اللي بيحصل اليومين دول تحت مسمي الحب والرومانسيه لأن ما بني علي باطل فهو باطل.


هل انتي راضية عن نفسك؟

الحمد لله طبعا راضيه وعمري ما اتبطرت علي النعمه وانا شايفه نفسي كويسه الحمد لله

بس طبعا اي حد مهما كان كويس بيتمني انه يبقي احسن واحسن

وانا حاسه ان ربنا بيحبني لأنه عمره ما أختاري حاجه سيئه وكانت زمان المحفظه بتاعت القران تقلنا ان ربنا بيحبكم للانه اختاركم وفضلكم علي كتير من الناس في حفظ كتابه الكريم بس ربنا يهديني ويبعد الشيطان عني وانا ابقي ملاك لاني بحس والحمد لله ان نفسي من النفوس اللوامه يعني لو وقعت في غلط بتقولي اقفي لحد هنا وربنا يرقيني يارب وأبقي من النفوس المطمئنه

10-ماالذي يلفت انتباهك بسرعه في الشخص لكي تعجبي به ؟



لو من بعيد " ماشي يعني " بيلفت نظري الملابس وده عادي مجرد إعجاب سطحي

اما لوكان قريب مني بكلمه وبيكلمني حتي لو من اول لقاء اكيد بيلفت نظري طريقه كلامه شخصيته واكيد نسبه احترامه لنفسه اولا ثم للاخرين. اه طبعا وتدينه وحبه لدينه ..


11-هل تؤيدين الزواج العاطفي ام الزواج التقليدي ؟ ولماذا ؟



من الظاهر او من اللي انا شيفاه ان مش كل الارتباط العاطفي بيتكمل للاخر يعني نقدر نقول معظمه

لاني قولت من الاول ما بني علي باطل فهو باطل ... ولكن إذا كان ارتباط عاطفي بمعرفه اهل الطرفين فما اعظمه واطهره من ارتباط

اما الزواج التقليدي او باللغه العاميه " زواج الصالونات" انه الام هي التي تختار زوجه ابنها المستقبليه وهو يوافق بدون ما يتعرف عليها فأنا من المعارضين لهذه الطريقه لانها تبوء بالفشل في النهايه.

اما إذا كان زواج تقليدي من جهه اخري بمعني ان يري الشاب الفتاه ويعجب بها ويسأل عنها ويطلب منها انها تحدد ميعاد لكي يقابل والدها وشغل الافلام العربي او يعني طريقه زمان

ممكن للشباب ما تكونش مستحبه ولكنها الطريقه التي تزوج بها اباؤنا وامهاتنا



اما في رأيي الشخصي



فأنا أؤيد الزواج العاطفي التقليدي الذي يتم بمعرفه عائله الطرفين ... يعني ان انا ما كنشي خايفه من حاجه من الاخر يعني لما اسجل اسمه يكون بأسمه ومش بأسم حد تاني لاني اكتر حاجه بكرها في الدنيا الكدب.

12-ايه رأيك في الحب...و هل بتحبي دلوقتي...و هل حبيتي قبل كدة؟
لو اه..كم مرة...و كم مرة من طرف واحد

رأيي في الحب اللي هو الحب اكيد الحب وجهان لعمله واحده...

الوجه الاول شئ جميل ومصدر سعاده ناس كتير

الوجه الاخر انه مصدر تعاسه ناس اكتر في فراقه

و هل بتحبي دلوقتي...

دلوقتي لأ مأجله الحكايه دي شويه لحد ما أبقي قدها او بمعني اصح لسه الحب الحقيقي ما زارنيش وبعدين انا قلت قبل كده ان انا خوافه بخاف من اي شئ جديد ومن اللي بشوفه في الارتباط دلوقتي سواء " love story" او ارتباط خطوبه او جواز معظمه بيبوء بالفشل

فمن الاخر اتعقدت وعاهدت نفسي اني ما اجريش ورا الحب ولا ادور عليه وأخليه هو اللي يجري ورايا ويدور عليا.



...و هل حبيتي قبل كدة؟
لو اه..كم مرة...و كم مرة من طرف واحد

الحب اللي هو الحب لأ بس ممكن نقول مره واحده بس هو ما كنشي حب كان مجرد اعجاب

يعني ان بنت ملهاش ولا تجربه وحد قالها كلمه حلوه اكيد هتعجب بيه ولكن الحب ده ما دامشي إلا بضع شهور ولكن سرعان ما انتهي بدون ندم والحمد لله تقدروا تقوله حب طفولي

واللي اكد لي انه مش حب

انهم بيقوله اصعب حاجه في الحب فراقه وانا بقه في الحاله دي عكس كل الناس لاني حسه ان بعد فراقه مرتاحه راحه غريبه راحه لا يعلمها إلا الله لأني استخرت ربنا والحمد لله ربنا بعده عني

مع العلم اني لا شفته ولا حتي سمعت صوته من الاخر كانت معرفه سطحيه عبر النت وانا دلوقتي حتي مش بفتح الموقع ده الحمد لله وربنا يعلم اني صريحه في كل كلمه قلتها وبس

13-هل لو فعلا أعجبتي بشخص ما...بس هو مش حاسس بالاعجاب دا...و انتي فعلا بتحبيه جدا...هل ممكن تقوليليه بحبك؟


لا طبعا مش هقوله

بس اكيد لو البنت بتحبه بجد الحب ده هيبان عليها من كلامها ومن طريقه تعاملها معاه اكيد هتعامله معامله خاصه غير أي حد هتحاول تلفت نظره بأي طريقه واكيد هو لو بيفهم هيحس بيهاوهو اللي هييجي ويصارحه بحبه ليها .
بس انا مش عارفه لو حصل معايا الموقف ده هحتفظ بيه لنفسي وهدعي ربنا انه يكون من نصيبي


يارب اكون عند حزن ظنكم واني ما أكونشي طولت عليكم
وعايزه رأيكم بصراحه في إجاباتي
ودمتم سالمين

انتظروا باقي الاجابات قريبا ان شاء الله

شكراااااااااااااااا يا رباب اجابات جميلة جداااا والاجابات واضحة وبتعرفنا عليكى اكتر
بانتظار باقى الاجابات

رباب بجد اجابات تحفة ما شاء الله عليكى
بانتظار الباقى


هوبه
never mind
حصل خير
و انا قولت ف الاول انى مش زعلانة
و زى ما انت قولت جل من لا يسهو

شكرا لكلامك الحلو عني يا رباب و كويس انك شايفة اني دمي خفيف وربنا يجعلني خفيف علي قلوب الناس دايما

ضحي

شكراااااااااااااااا يا رباب اجابات جميلة جداااا والاجابات واضحة وبتعرفنا عليكى اكتر

انتي اللي جميله علشان كده شايفه كل حاجه جميله
وانا اللي نفسي اتعرف عليكوا أكتر
ومبروك مره تانيه علي النجاح

اوشين

رباب بجد اجابات تحفة ما شاء الله عليكى

ربنا يخليكي وده بس من زوقك

عادل

بجد يا رباب منوره الكرسي واجابات جميلة جدا ما شاء الله عليكي
وربنا معاكي في باقي الاسئلة
وشكرا على الكلام اللي قلتيه عليا في اجاباتك على الاسئلة وفعلا ده كتير عليا اوي

ربنا يخليك يا عادل والكرسي منور بوجودك والله
وإذا كان علي الكلام فاده اقل حاجه وبعدين هو ده اللي انا شايفاه
يعني مش جايبه حاجه من عندي

مادو

شكرا لكلامك الحلو عني يا رباب و كويس انك شايفة اني دمي خفيف وربنا يجعلني خفيف علي قلوب الناس دايما

لاشكر علي واجب
اكيد طبعا دمك خفيف وانت خفيف علي قلوبنا دايما ان شاء الله
وعلي فكره خفه الدم هي الصفه السائده في كل اعضاء المنتدي
وده سبب استغرابي من تسميته بمنتدي الاحزان

متشكره جدا جدا علي رأيكوا فيا ورأيكوا بإجاباتي وإني كنت عند حسن ظنكم فيا
وربنا يخليكوا يا أحلي اعضاء في الدنيا
ثااااااااااااااانكس

بيكهــام

اولا :بجد بشكرك علي الاجابات الرائعه دي باربابوواضح فعلا ماشاء الله عليكي انك شخصية جملة
وحبوبه واجتماعيةوصريحةالله ينور بجد علي الاجابات الجميلة



لا شكر علي واجب

وربنا يخليك علي رأيك ده ودي شهاده انا أعتزبيها



ثانيا : بشكرك جدا علي الكلام الحلو اوي اللي انتيكتبتيه علياميرسي اوي بجد

قلتلك لاشكر علي واجبوانا بجد بقول اللي انا شيفاه

ميرسي ليك انت علي ردك الجميل ده



عضو مفقود...فيالوقت الحاليبيكهام
لعل يكون المانع خير

خير ان شاء الله يا رباب
مكانش فيه مشاكل
واديني رجعت ليكم يا احلي منتدي



الحمد لله انه خير ومكانشي في مشاكل

ونورت المنتدي من تاني



عضو تحسي انه مختلف...بيكهام و لمياء

ميرسي جدا
بس مختلف من ناحية ايه ؟؟



لا ميرسي علي واجب

وانت اهو اللي جاوبت علي نفسك

مختلف من ناحيه انك فيك حاجات فيك شايفها غيرك وانت مششايفها

متذبذب بعض الشئ في ثقتك بنفسك مش عارفه ليه

وده احساسي اللي انا حساه يعني اكيد من المحتمل انه نا يبقاش فيكوبس



بجد شكرا جزيلا يا رباب علي الكلام الجميلدهوبشكرك جدا عليهوانا فعلا مبسوط اني اتعرفت عليكيوبجد انتي اضافةجميلة جدا للمنتدي

ربنا يخليك ولا شكر عليواجب

وانا اللي اتشرفت بجدبمعرفتك

والمفروض انك تشكر ايمي لان هياللي عرفتني عليكم



واجاباتك جميله قويوعجبني جدا الاجابه بتاعت
الوزاره اللي تختاري تمسكيها
وعجبني جدا منطققك في تبرير اجابتك
في انتظار المزيد من الاجابات الشيقة



بجد ده كتير أويعليا

وانا مبسوطه ان السؤالعجبك

ومنطقي كمان انه عجبك وما تنساشإن انا اداب فلسفه

يعني ان شاء الله فيلسوفهالمستقبل هههههههههه



ان شاء الله قريب هستكملالاجابه

ميرسي ليك اوي ياأحمد





إيهــــاب





بحييكي علي اجاباتك الصريحة و الواضحة
بجد فعلا اجاباتك ليها شكل مختلف

و سهلة و بسيطة و في نفس الوقت معبرة جدا



ربنا يخليك يارب يا ايهاب

وانا فرحانه اني كنت صريحه وواضحه

متشكره جدا علي رأيك ده اللي بجد هو اللي صريح وواضح



و بالنسبة للعصير و المطربة المفضلة

بصرة

نيههههههههها



طيب كويس والله ان فيه حاجه مشتركه بينا

بس قولي الجوافه بتحبها باللبن ولا من غير

ههههههههههههههههه



و بالنسبة لجريمة القتل اللي بتتكلمي عليها

فطبقا لسجلات المحقق هوبا لو كان قصدك اللي في دماغي

الجريمة دي حصلت في فبراير 2009

و جوزها اللي كان متزوجها بعقد عرفي كان اماراتي الجنسية

و هرب علي دبي بعد الجريمة علي طول و اهله اللي ساعدوه علي الهرب

و علي فكرة هو قطع جثتها 8 اجزاء

و السيناريو المرجح انه قتلها نتيجة ضغط اهله عليه عشان هو اتجوزها علي غير رضاهم

دا غير انه كان دائم السكر و كان دايما يتعاطي مخدرات و في اللي كان بيقول انه عنده مرض نفسي


اي خدعة



أكيد طبعا صح ودي حاجه مش جديده عليك

وعلي فكره اتضح ان القاتل فلسطيني الجنسيه وليس إماراتي زي ما في البطاقه



و عجبتني جدا اجاباتك عن سؤال الحب و انك وصفتيه من الجانبين



متشكره جدا علي رأيك ده يا ايهاب



و عجبتني كمان الحكمة

لا تكن صلبا فتكسر..و لا تكن لينا فتعصر

خير الامور الوسط



ربنا يكرمك يارب وانا مبسوطه انها عجبتك

واكيد طبعا خير الامور الوسط



الله ينور يا رباب و منتظرين باقي الاجابات



ميرسي جدا ليك يا ايهاب

وده من بعض ما عندكم أكيد



ومتشكره لتاني مره انك سمحتلي اني اقعد علي الكرسي علشان اتعرف عليكوا وتتعرفوا عليا اكتر واكتر





متشكره ليكم جميعا



وانتظروا باقي الاجابات قريبا

اوك يا ايهاب وربنا يخليك
وإذا كان علي الجوافه مش مهم تبقي بإيه المهم انها جوافه
و ثانكس علي القضيه يا ايها المحقق

وده جزء اخر من الاجايات




[b]14-اشتركتي في برنامج من سيربح المليون و حصلتي علي الجائزة الكبري 2 مليون ريال...ماذا تفعلين بيهم؟
ياااااه ، أكيد هعمل حاجات كتير أولها مثلا

إني هتبرع بجزء من الفلوس دي للمحتاجين علشان ربنا يباركلي فيهم

وبعدين زي ما بيقولوا الاقربون أولي بالمعروفأكيد اللي محتاج في عائلتي حاجه هعملهالهوهجيب لبابا أتوبيس بباقي الفلوس ده لو اتبقي وبس ومش عايزه حاجه ليا لأن اكيد طالما هما هيبقوا مبسوطين انا كمان هبقي مبسوطه ، يكفي انهم هيدعولي ودي احسن حاجه

وبعدين اكيد بابا مش هينساني واكيد هيزودلي المصروف ههههههههههههه

15-هل هزمك حزنك في يوما من الايام؟

كتييييييييييييير أوي بس مش لدرجه الهزيمه ، اصل انا بجد حساسه زياده عن اللزوم وممكن أعيط لأتفه الاسباب ودي صفه وراثيه في العائله ومتهيألي اكبر دليل قدامكم " ايمي "

ناس كتير بتقولي انتي ليه علي طول حزينه بس مش عارفه ليه الانطباع ده بيوصلهم

بس انا بجد ساعات كتير بكون حزينه ، بس علشان طيبه اقل كلمه بترضيني.


16-مستحيل انساك... لمن تقوليها ؟

كلمه جميله اوي وما تستغربوش انا هقولها لمين



انا هقولها لوالده صديقتي مريم الله يرحمها توفت عام 2007 ربنا يارب يرحمها ويدخلها فسيح جناته .

اصلي كنت بحبها أوي أوي وهي كمان كانت بتحبني أوي لدرجه ان مريم كانت بتغير مني في بعض الاوقات بقولها وحشتيني اوي وانا مستحيل انساكي لاني كنت بعتبرك بمثابه أمي

ربنا يرحمها ..

17-صفي نفسك بكلمات بسيطة كما يراك الناس

المفروض مش انا اللي اتسأل السؤال ده المفروض انك تسألوا للاعضاء بس اوك

بيشوفوني " طيبه ، دمي خفيف ، انطوائيه جدا – بس علي فكره ده مش مع أي حد ، وهاديه وفي حالي ومابحبش المشاكل بس الهدوء ده ساعات بيتفهم غلط لانه من كتر اني في حالي ساعات بيقولولي يا سوسه بس بالله عليكوا ما تضحكوا عليا لان اللي بيقولي الكلمه دي بزعل منه جدا لان والله العظيم انا مش كده

فاكرين الموضوع بتاع عادل اللي هو " طيبه القلب == ضعف الشخصيه " هو كده بظبط بس بعنوان تاني " اللي طيب وفي حاله == انه لئيم وسوسه "

وبـــــــــــس

18-اول انطباع الناس بيخدوه عنك

اول انطباع " انطوائيه " و هاديه و بتعود علي الناس بسرعه رهيبه بس مش اي حد

ومش عارفه هو السؤال ده يشبه اوي السؤال اللي قبله وانا عارفه انه فيه فرق بس

ياريت انتوا اللي تقولولي وبصراحه شديده أول انطباع أخدتوه عني


18-ما هو طموحك وأهدافك في الحياة..والتي ترجين ألا تقابلي ربك إلا وهي محققة؟
طموحي صغيره اوي وانا شايفه ان من حق اي انسان انه يحلم حتي ولو كان عارف ان تحقيقه مستحيل .....

انا نفسي اكمل دراستي علي خير وأبقي حاجه من الاخر مش استسلم وأقعد في البيت إن شاء الله ناويه اتخصص فلسفه السياسه واشتغل في وظيفه تكون كويسه وإني اكون علي حسن ظن اهلي وانهم يفخروا بيا في كل الاوفات ... يعني وان ربنا يرزقني بأبن الحلال اللي يخاف عليا وأبقي حاسه معاه بالأمان ويرزقنا بالذريه الصالحه... ودي طموح اي بنت ...

وأهدافي نفسي علي رأي احمد حلمي " أغير الواقع " . مش عرفه إزاي بس اكيد ان شاء الله الفرصه هتجيني.

وكمان نفسي في حاجه نفسي أموت شهيده من وانا في ابتدائي بفكر في الموضوع ده

واللي بترجاه من ربنا وان انا اقابله وجهه الكريم وانا محققاه إني أكون مستعده للموت يعني ما أبقاش خايفه منه يعني العمل اللي يخلينا متأكده من رحمه ربنا ان انا ادخل بيه الجنه ...


19-دمعة سقطت من عينك؟؟ من كان سببها؟؟

بص انا متعوده كتير علي موضوع الدموع دي بس علي طول بعيط بسبب بابا متستغربوش

بس علي فكره انا متأكده من حب بابا ليا وواثقه منه اوي بس الحكايه في طريقه المعامله بحس يمكن علشان انا طيبه علي طول بييجي عليا انا بس انا عارفه اني لازم استحمله لانه بابا ومهما عمل فيا في الاخر ده بابا حبيبي اللي ماليش غيره في الدنيا واللي لا يمكن يتعوض ولا بأبهات الدنيا كلها ربنا يا رب يخليه ...

20-نقظة ضعفك؟

نقطه ضعفي واللي ما بقدرشي اعمل حاجه قدامها هي الدموع يعني لو شفت حد بيبكي قدامي مش بقدر استحمل وبدل ما أهون عليه بتلاقيني بشاركوا

ونقطه ضعفي التانيه كلمه انا اسف وخصوصا لو من ولد لأني قلت في موضوع قبل كده ان الاولاد مش متعودين علي الكلمه دي والدليل انه لو قالك انا اسف وما قبلتهاش يبقي خلاص انت اللي اختارت وعلي فكره بردوا بالنسبه للبنات اكيد بتأثر فيا يعني انا لما أختي أو مريم زميلتي بيقولولي انا اسفه بسامحهم علي طول...

21-احكيلنا علي اكتر موقف محرج حصلك في حياتك

طب ليه الاحراج ده هقولك وأمري لله

كنت مره انا وزميلتي مريم في نادي التجاريين بالنهار وأكيد طبعا ملابس النهار بتختلف عن ملابس بالليل وأحنا في نادي يعني مكان للترفيه.

فلاقينا واحد جاي لابس بدله وجرافته وتحس كده علي رأي عبله كامل " شباااااب الجييييييل "

فستغربنا جداوبعدين قام الشاب ده بينده علي الجارسون وبيقولوا لو سمحت قمنا متدورينوبصينا عليه في وقت واحد بطريقه تلفت النظر لانه كان قاعد ورانا ... طبعا اتحرجنا جدا جدا وهو كمان اتحرج جدا بس بعديها قعدنا نضحك هنعمل ايه يعني غير كده . وبس

22-علاقتك بأفراد اسرتك...ايه نظامها؟

الحمد لله كويسه انا بحبهم كلهم جدا جدا واكيد كمان هما بيحبوني كمان

ماما - ربنا يارب يديها الصحه ويخليهالي بحبها قوي وماليش غيرها في الدنيا. وهي كمان بتحبني وبتحاول بقدر الإمكان إنها تعوضني لو بابا ضايقني .

بابا- ربنا يخلي ليا ،وأنا بحبه قوي بحس ان شخصيته قويه وأحلي حاجه فيه انه كرامته فوق كل شئ . أما عن علاقتي بيه فهي مضطربه بعض الشئ لاني من صغري ومن كتر احترامي ليه تولد عندي نوع من الخوف والخوف ده ملازمني حتي الان مش عارفه ليه ، ممكن اتقبل ان اي حد يزعقلي إلا هو لو بس بيتكلم معايا بصوت عالي ادخل انام وأقعد اعيط .

بس اللي مزعلني منه واللي كل الناس حساه يعني مش انا بس هو التفرقه في المعامله بحس إن بابا بيعامل أختي احسن مني بكتير ولو كان فيه موقف حصل مني يضايقه بيعاقبني بس لو نفس الموقف حصل من اختي بيكتفي انه يلفت نظرها ان ده غلط

بس أرجع واقولكم ان السبب في كده واللي انا فهمته متأخر إن انا غير اختي في حاجات كتير يعني اختي جريئه وبابا هو اللي عودها علي كده وانا زي ما قلتلكم جبانه جدا فأكيد لازم يبقي في فرق

ربنا يارب يهديهولي .

أختي – اكبر مني بسنه و13 يوم ، ودي بقه عكسي يعتبر في كل حاجه ، انا بحبها أوي وأكيد هي كمان بتحبني ساعات معامله بابا كانت بتأثر علي علاقتي بيها بس ده كان زمان لكن دلوقتي احنا بنعرف نتعامل إزاي مع بعض ، علي طول نائر ونئير بس طبعا بهزار ويمكن ده هو اللي بيكسر الملل . وبس
أخويا - عنده 11 سنه وده بقه شقي جدا جدا جدا ربنا يهديه بس شقاوته لذيذه بيعتبرني اخته الصغيره يعني مش عاطي لفرق السن اللي بينا أهميه نهائي بس احنا بنحب بعض أوي


وعلي فكره أنا كان نفسي اختي الكبيره تبقي ولد وأخويا الصغير يبقي بنت بس الحمد لله علي كل شئ.

وإنتظرونا في الجزء القادم ان شاء الله[/b]

اجابات جميلة يارباب
وبجد نورتى الكرسى والمنتدى كلة
وانا كمان نفسى اتعرف عليكى
ومنتظرين باقى الاجابات

ننوه للمرة الاخيرة ان الحد الاقصى للاجابة هو يومان

تنفيذا لقرار المدير العام و اعتماده من المشرف العام رسميا

سيطبق القرار فيما بعد مشاركة رباب و ستمنح للاجابة موعد اقصاه 5/8

أولا يا أحمد انا ماكنتش اعرف انك نوهت قبل كده
ثانيا هما قالولي علي مهلك وبراحتك وان بيكهام جاوب في 3 شهور
وبعدين إزاي 40 سؤال اجاوب عليهم في يومين
يعني هو انا ما فيش ورايا حاجه غير الكومبيوتر
وبعدين الاسئله محتاجه وقت كبير ده لو هجاوب عليها بصراحه
وانا مش هلحق اجاوب في الموعد اللي حددته
ولو عايز تلغيه براحتك
وشكرا

بسم الله الرحمن الرحيم

بعد قراءه الاعتراض تقرر الاتى

1. لا يجوز ان يتعدى كورسى الاعتراف 19 سؤال
2.سيتم فقط و لا اخر مرة و لن يسمح بعدها مده فترة رباب على الا تتأخر فى الاجابة
3.احد اسباب القرار هو حالة العضو المحترم بيكهام
4.يعمل بالقرار بعد انتهاء رباب من الاجابة

و اخيــــــــــــــــــــــــــــــــرا

نرجو عدم الاطالة المتعمدة فى الاجابة

لان هذا الموضوع هو من اكثر الموضوعات حيوية

و كما قلت لكم ساعدونى فى اداء مهمتى و كونوا انتم مشرفى انفسكم

ربنا بجد يخليكي يا ساره علي رأيك ده
ودي شهاده أنا أعتز بيها
وانا كمان نفسي بجد اتعرف عليكي وانا واثقه إن هي مش مجامله ولا حاجه
بجد الخوف ده شئ صعب جدا ده لدرجه إني مش عارفه أجاوب علي السؤال بتاع أكتر موقف جرئ
مش عارفه أقولك ايه يا ساره علي رأيك ده
متشكره ليكي أوي وربنا يارب يوفقك إنتي كمان في حياتك
ربنا يخليكي يا قمر

ادهم

شخصيه غريبه ما تتفهمش بسرعه
بس هو عكس اللي ظاهر في المنتدي
انسان طيب ودمه خفيف وسبحان الله تتعود عليه بسرعه
بيحب اصحابه اوي وبيحب الهزار


ياراجل يعنى بيبان عليا ف المنتدى شرير؟؟؟
لو اه
قولى
عشان اغير طريقتى مع الاعضاء الجدد